Eine Bemerkung vorab:
Ich bedanke mich sehr herzlich bei Liesel und Ewald für diesen besonderen Artikel und seine Bilder. Zur Sprache möchte ich bemerken:  man kann sich über die kölsche Schreibweise ohnehin „streiten“, muss man aber nicht, und in diesem Fall kommt noch ein bißchen Vorgebirgsklang dazu! Viel Spaß beim Lesen, am besten laut!.

Kutt all dämm  Herrjott singe – Taizé-Seminar opp  Kölsch vom 15. – 17.12.2023
im Benediktinerinnenkloster Düsseldorf-Angermund.

Zo dämm Seminar kohme mir wie die Jongfrau zomm Kingk. Weil in der Herberje nämlich doch Platz woor. Wäjen Krankheed mooten Löck avsaare un mier konnte nohröcke.
Un su kohm en bunte Mischung uss Löck zesamme denne die kölsche Sprooch vetraut un welche, die dropp neujierich woore.

Beim Ankomme am Friidaach hamme noch jett jefroore, ävver om Wääch noh de Zemmere jing et zoh wie im „3 D – Labyrinth“: De Trapp eraff, zwei, drei Mool de richtije Abzweijung nämme un dann noch die Qual, et schönste Zemmer uszesööke. Denn jedes sooch anders uss – liebevoll zesammejestivvelt!

Dann jing et zom Jruppenraum. Der dääte mir met unsere Teilnehmere joot usfülle.  Die Kält jing dann von aleen.

Der mietste von oss wooren die iertste Töön anscheinend vertraut. Et Vera moot ävver diejenije bremse, die von Anfang aan en ihrer Stimm sönge wollte. Suh jeht datt net. Denn wie in Taizé moss mer en de iertste Rond ens alles in de Sopranstimm hüüre un sönge, datt Jede´ weess wie et sich einstimmich anhüert.

Datt Sönge däät widder richtich joot, ävver datt met der Dosis moot noch jätt jeüb´ werde. In dämm kleene Raum moote sich manche e Bitzje zeröck nämme, sönns woor dä Klang netmieh en de Wooch un mieh laut als schön.
Ävver wer Vera kennt, weess datt se in su ne Situation uss vollem Hätz ennjrief un alles wedder in de Reih brängk.
Su hatte mer vüür`m Oovendesse at en Portion Leeder jeproob die dann met nem Deel von der Weihnachtsjechichte op Kölsch als Oovendlob enn de Kapell vüürjedraare  werde konnt.

Am Samsdaach -Morje bräät ons Vera in de Kapell met nem Körper-Jebett op Temperatur un im Morjen – Lob dann „spirituell“ opp de Wääch. Met dem Leed “saach an, saach an“ kräät Vera ons su richtich an et „ärbede“. Se leed uns der Texx nohspüre. Watt soll dat jevve? Wo lääd me et Jewech dropp? Watt määt et für ne Ungerscheed op me iher met Wut un Ärjer oder höösch un met Bedaach sönge deht? Bis dat Leed in de Wooch woor dät et jet duure. E Jlöck dat me noch zwei jesangstarke Minsche dabei kreschte: Et Raffaela un de Herbert. Su hatte mer met Daniela un Marian sujar vier Solostimme, die met Hätzensfreud debei woore.

Terek hönger dämm Kluuster konnt me sich beim Spazierjang prima erholle un ene Verdaungsjang mache. Dat woor och nühdich – no all der Leckereie uss d´r Köösch, die keen Wünsche offen leete.
Zwesche Kaffe un nächster Sangesrunde däät et Vera dänne, die wollte, su richtich enheize. Flöck e paar Desch jeröck un Platz jeschaffe. Wer at ens met Vera Yoga jemaat hät, weess wovon ich spreche. Der weess wie wärm et widd, wenn me met der Fott övver de Deck rubbelt, bis me jeföhlt e Spiejelei broode kann. Dat Jevöhl von Kält  woor einfach fott. Vollkommen futsch!

Zom Ovend kohme dann noch e paar Taize – Anhänger un dääten uns im Bedde un Sönge ungerstütze. Beim jemütliche Deel donoh woore se mettendren un Jedem hätzlich wellkomme.
Suh konnt ne reich jefüllte Daach entspannt usklinge. Irjendwie schingk et em Raffaela singem Auto bei ons joot jefalle ze hann. Datt wollt jahnet noh Huus unn däät net ansprönge. Et hatt ävver am Engk doch Metjeföhl un hätt et sich noch anders övverlaat.

Am Sonndaachmorje moot de Heizung in de Kapell noch „Ssepport“(Ungerstützung) hann. Doh woore mer wedder fruh, datt et Vera uns die Heizung durch et Körperjebett ersetze konnt. En schönem Kätzesching in de aankummende Daach erinn…
 
Im Kluuster sooch mer av un zoh ene Mann, der me für de „Fessility- Mänädscher“ (Huusmeester) hahle konnt. Jedenfalls woss der eene oder andere von ons att, datt er sich he im Kluuster an velle Stelle nötzlich määt – un datt net met zwei linke Hängk! Do hann ich ävver net schlääch jestaunt, als der dann zur hellije Mess im Priesterjewand in de Kapell ennröcke däät! Übrijens woor et bis opp de letzte Plaatz besetz´. Datt im Kluuster ne fresche Wind weht, hätt sich anscheinend rond jesproche!
Ooch datt Orjelspell woor en Eijenleistung von dä Schwestere. Schwester Emanuela sälevs däät beherzt in de Taste jrieve. Am Schluss wutte mir dann als Jrupp, dänne die Taizé- Jesäng am kölsche Hätz lijje un he im Kluuster dran jeärbed hann, erwähnt. Datt woor die Oppforderung dozoh, noh dä offizielle Mess´ en Kostprob von zwei Leeder zom Beste ze jääve. Mier koome ons vüür, wie fröher die Missionare, die ne neue Jeist un en neue Sprooch in d´r Diaspora verbreede. Mer brooten ävver keen Angks ze hann, se däten metsinge  un mer krääten sujahr Applaus!

Zo dämm fresche Wind im Kluuster jehüüre Offenheit un Freundlichkeet. Un suh es et doh üblich, datt mer noh de´Sonndaachsmess noch zo e paar Wööd oder nem Klaaf bei nem Tässje Kaffe enjelade ess un zosammesteht.

Su verjing ooch am Sonndaach de Zick im Rubbeldidubb!
In d´r Schlussrund´im Jruppenraum hatte me all noch ens Jeläjeheet, et Hätz usszeschödde. Mir hatten ävver keene Jrund uns ze beklaare! Et hätt uns sihr joot jefalle, joot jedonn un die Siihl hätt
fresches Fooder jekrääch. M´r hatt datt Jeföhl, datt im Hätz e Pöötzje wedder opjejange ess, datt womöchlich lang affjeschlosse woor. Un wenn et Hätz e Bissje leechter ess, kammer besser, friedlicher un fröhlicher opp Weihnachte an jonn!

Suh wollle mir ooch noch dankbar an die Minsche denke, die järn dobei jewässe wäre, ävver krank ze Huus blieve moote. Mir hoffe janz fess, datt Ihr wedder joot kuriert un jesond sedd.

Von janzem Hätz, leev Vera: Danke für die aale un neue kölsche Leeder, die uns wedder deep im Hätz erwisch hann. Un: Schön, datt et ooch in Düsseldorf Spass jemaat hätt.

Liesel Rentschler un Ewald Klein im Dezember 2023